Нийслэлийн ИТХ-ын төлөөлөгч Б.Нэргүй өнгөрсөн долоо хоногт өөрийн сонгогдсон тойрог болох Налайх дүүрэгт ажиллалаа. Энэ үеэрээ цар тахлын дэгдэлт, дархлаажуулалтын нөхцөл байдалтай танилцаж, дүүргийн салбар нэгжийн удирдлага болон аж ахуйн нэгжүүдийн удирдлагатай уулзсан юм.
Дүүргийн Онцгой комиссоос коронавируст халдвараар 479 өвчилж /өнгөрсөн долоо хоногийн байдлаар/, 320 хүн эдгэрч эмнэлгээс гарсныг мэдээллээ. Тэгвэл дүүргийн насанд хүрсэн нийт иргэдийн 73.7 хувь нь дархлаажуулалтын I тунд, 54.2 хувь нь II тунд хамрагдсан байна. Энэ нь нийслэлийн хэмжээнд өндөр үзүүлэлттэйд тооцогдож буй аж. Цаашид дархлаажуудадтыг эрчимжүүлж, энэ долоо хоногт иргэдээ бүрэн вакцинжуулах төлөвлөгөөтэй байгаа ажээ. Ийнхүү нөхцөл байдалтай танилцаад, Нийслэлийн ИТХ-ын төлөөлөгч Б.Нэргүй цар тахлын эсрэг арга хэмжээнд дэмжлэг үзүүлж, Налайх дүүргийн Онцгой коммист гурван сая төгрөг хандивлалаа.
Мөн тэрбээр Налайх дүүргийн орон нутгийн өмчит үйлдвэрийн газруудын нөхцөл байдалтай танилцаж, ажил, үйлчилгээнд нь тулгамдаж буй асуудал, иргэдийн санал, гомдлын талаар мэдээлэл авсан юм. Тухайлбал, “Чандмань Налайх” ОНӨААТҮГ-т 2020 онд 2 тэрбум 600 гаруй сая төгрөгийн өр, төлбөр хуримтлагдан, үйл ажиллагаа нь доголдох хэмжээнд хүрсэн гэдгийг тус газрын дарга З.Болдбаатар хэлсэн. Тэрбээр “Цар тахал, хөл хориотой холбоотойгоор бидний ажлын ачаалал нэмэгдсэн. Хуримтлагдсан өр, төлбөрөөсөө 260 сая төгрөгийг нь төлж барагдуулсан. Цаашид бидэнд хийхээр төлөвлөсөн олон ажил байна. Тухайлбал, ухаалаг худгийн тоог нэмэгдүүлэх, байгууллагын санхүү, төлбөр, тооцоо, үйлчилгээний нэгдсэн стандартыг шинэчлэн сайжруулах ажлыг зохион байгуулах, үйл ажиллагааны орлогыг нэмэгдүүлж, зардлыг бууруулах, үр ашгийг нэмэгдүүлэх зэрэг ажлыг төлөвлөн хэрэгжүүлж байна” хэмээн танилцуулав. Үүний зэрэгцээ нийслэлийн зүгээс дэмжлэг туслалцаа авч, шийдвэрлүүлэх тодорхой асуудал байгааг ч уламжиллаа.
Нийслэлийн ИТХ-ын төлөөлөгч Б.Нэргүй энэ мэт тулгамдаж асуудлуудыг шийдвэрлүүлэхэд онцгой анхаарч ажиллана гэдгээ илэрхийллээ.
Эх сурвалж: Нийслэлийн ИТХ-ын ХМОНХТ